Atamboyev: Moskvada Suriyaga Qirg‘iziston harbiylarini jo‘natish masalasi ko‘tarilmadi

Qirg‘iziston prezidenti Almazbek Atambovning ma'lum qilishicha, Moskvadagi uchrashuvlar vaqtida qirg‘iz harbiylarini Suriyaga jo‘natish masalasi muhokama etilmagan. Bu haqda «Interfaks» xabar bermoqda.

«Bu masala tor doirasidagi uchrashuvlarda ko‘tarilmadi, biz Rossiya prezidenti Vladimir Vladimirovich Putin bilan kechki ovqat vaqtida 2,5 soat birga bo‘ldik, bu masala umuman ko‘tarilmadi», - dedi Atamboyev.

Shuningdek, davlat rahbarining ta'kidlashicha, Suriyaga mamlakat harbiylarini yuborish – oddiy ish emas, sababi buning uchun Kollektiv xavfsizlik shartnomasi tashkiloti barcha davlatlarining qarori, BMT rezolyutsiyasi kerak, shundan so‘ng buni mamlakat parlamenti yakuniy tarzda hal etishi kerak bo‘ladi. Mamlakat prezidentining bildirishicha, Suriyaga faqatgina kadr harbiylar, zobitlarni yuborish lozim.

«Biz buni umuman muhokama qilmaganmiz, hayronman, bu masala qayerdan paydo bo‘ldi», - deya qo‘shimcha qilib o‘tgan Atamboyev.