Yana kollej. 300 dollarni o‘margan kollej o‘quvchisi ushlandi

Toshkent viloyatining Bekobod shahar ichki ishlar bo‘limiga fuqaro Bahrom Sattorov (ism-familiya o‘zgartirilgan) ariza bilan murojaat qilib, joriy yil 1 noyabr kuni tungi soat 23.55 larda noma'lum shaxs Bekobod shahar Mustaqillik ko‘chasida turgan unga tegishli Matiz rusumli avtoulovi oynasini sindirib, salonidan narxi taxminan 180 ming so‘mlik kompyuter monitori va 300 AQSh dollarini o‘g‘irlanganini ma'lum qilgan. Bu haqda O‘zA xabar bermoqda.

Qilmish-qidirmish deganlaridek, "uddaburon"ning izi tezda fosh bo‘ldi. Olib borilgan tezkor-tergov harakatlari natijasida ushbu jinoyatni 1999 yilda tug‘ilgan, Bekobod sanoat kasb-hunar kolleji o‘quvchisi S.A. sodir etgani aniqlanib, ushlandi. 

Ushbu holat yuzasidan O‘zbekiston Respublikasi Jinoyat kodeksining tegishli moddasi bilan jinoyat ishi qo‘zg‘atildi.