62 dollarlik qarz tufayli o‘n yoshli qizchani garovga olishdi

Armanistonning Yegvard shahrida yashovchi ayol o‘z tanishining o‘n yoshli qizini 62 dollar (30 ming arman drami)lik qarz tufayli garovda ushlab turganlikda gumonlanmoqda. Bu haqda Armaniston Tergov qo‘mitasi saytida xabar berildi.

Tergovchilarning ma'lumotlariga ko‘ra, ayol «oilalar o‘rtasida uzoq yillar davomida yuzaga kelgan yaqin munosabatlardan foydalanib, aldov bilan, do‘konga borish bahonasida» qizni o‘z uyiga olib kirgan.

Shundan so‘ng u qizchaning onasidan 30 ming dramlik qarzini qaytarishni talab qilib, aks holda bolani qo‘yib yubormasligini aytgan, deyiladi TQ xabarida.

Ta'kidlanishicha, ushbu holat bo‘yicha jinoiy ish qo‘zg‘atilgan.

Gumonlanuvchi ayni damda ushlangan. Huquqni muhofaza qiluvchi organlar xodimlari tergov ishlarini olib borishmoqda. Ayolning aybi tasdiqlanadigan bo‘lsa, u 10 yilgacha bo‘lgan muddatga ozodlikdan mahrum etilishi mumkin.