POSCO Daewoo bilan Hi-Tech City bo‘yicha bitim imzolandi

Investitsiyalar bo‘yicha davlat qo‘mitasi, Toshkent shahri hokimiyati hamda Koreyaning POSCO Daewoo korporatsiyasi Hi-Tech City qo‘shma loyihasini birgalikda amalga oshirishdagi hamkorlik to‘g‘risida bitim imzoladi. Bu haqda Investitsiyalar bo‘yicha davlat qo‘mitasi matbuot xizmati xabar qilmoqda.
 
Tomonlar yangi bitimni joriy yilning 1 fevralida imzolashdi, u Toshkentda High Tech City yuqori texnologiyali shaharni barpo etish bo‘yicha 2017 yilning 22 noyabr kuni Seulda imzolangan bitimni to‘ldiradi. Loyiha umumiy qiymati 1,4 mlrd dollar. Taxminan 50 gektarlik maydonda biznes-markazlar, turar-joylar, ilmiy-tadqiqot markazlari, ta'lim, tijorat va sanoat muassasalari hamda boshqa obektlar joylashadi. Barcha obektlar «aqlli» texnologiyalardan foydalanilgan holda quriladi.

Bitim shartlariga ko‘ra, tomonlar loyihani amalga oshirishning birinchi bosqichiga kirishmoqda. U qo‘shma ishchi guruhni shakllantirishdan iborat bo‘lib, guruh loyiha barcha bosqichlari tezkor hamda sifatli amalga oshirilishi, obekt qurilishi uchun maydonni tanlash, kontseptual rejani ishlab chiqish va loyihaning dastlabki texnik-iqtisodiy asosini muvofiqlashtirib boradi.