Pnevmatik pistoletlarni olib yurish uchun ruxsat kerakmi?

O‘zbekistonda pnevmatik qurol olib yurish uchun maxsus ruxsat talab etilmaydi. XPKning navbatdagi sessiyasida shu haqda ma'lum qilindi. 

Xalqaro Press klubning 7 mart kuni bo‘lib o‘tgan navbatdagi sessiyasida IIV yuqori lavozimli mulozimlari ishtirok etdi. Unda jurnalistlardan biri O‘zbekistonda pnevmatik qurol olib yurish qonun bilan tartibga solinganiga qiziqdi. Bu savolga Jamoat tartibini qo‘riqlash boshqarmasining ruxsat berish bo‘limi boshlig‘i Teshaboyev javob berdi. 

“Bugungi kunda O‘zbekiston Respublikasi qonunchiligiga muvofiq, ruxsat berish tizimi faqatgina o‘qotar qurollarga nisbatan joriy qilingan. Oliy sudning 1996 yildagi Plenumida har qanday kalibr va kuchdagi pnevmatik pistolet yoki boshqa turdagi pnevmatik qurol o‘qotar qurol hisoblanmaydi, degan xulosaga kelingan. Shunga binoan, pnevmatik pistolet olib yurish qonun bilan tartibga solinmagani tufayli noqonuniy hisoblanmaydi”, - dedi Teshaboyev.

IIV Jamoatchilik va OAV bilan aloqalar boshqarmasi boshlig‘i, general-mayor Qutbiddin Burhonov ayni savolga aniq va lo‘nda qo‘shimcha qilib, “O‘zbekistonda pnevmatik qurolni olib yurish uchun hech qanday ruxsat kerak emas”ligini bildirdi.