Braziliyada ko‘chki vaqtida 10 kishi halok bo‘ldi  

Braziliyaning Rio-de-Janeyro shahri yaqinidagi Niteroy shaharchasida ko‘chki vaqtida kamida 10 kishi halok bo‘ldi. Bu haqda 10 noyabr kechki vaqt Globo telekanali ma'lum qildi.  

Ko‘chki oqibatida 9 ta turar-joy binosi va pitstseriya to‘liq yoki qisman vayron bo‘lgan. Voqea joyida 70 ga yaqin qutqaruvchi ish olib bormoqda.   

11 kishini qutqarib olishga muvaffaq bo‘lingan. Kamida 4 kishi bedarak yo‘qolgan deb hisoblanmoqda. “Biz ular hali tirik bo‘lishi mumkinligini hisobga olib ishlamoqdamiz”, deb aytgan o‘t o‘chirish xizmati boshlig‘i Robertu Robadey.

Dastlabki ma'lumotlarga ko‘ra, ko‘chkiga oxirgi kunlar Rio-de-Janeyroda kuzatilayotgan kuchli yomg‘irlar sabab bo‘lgan.