Mahmud G‘oipov professional boksdagi ilk raqibini nokautga uchratdi

10 noyabr kuni Rossiyaning Yekaterinburg shahrida RCC Boxing Promoutions promouterlik kompaniyasi tomonidan tashkil etilgan professional boks kechasida o‘zbekistonlik bokschilar ringga chiqishdi.

Professional boksda faoliyat boshlagan Mahmud G‘oipov tanzaniyalik Iddi Makveraga qarshi ringga ko‘tarildi. O‘zbekistonlik bokschi birinchi raunddayoq raqibni nokdaun holatiga tushirdi. Bu vaziyatda raund yakunlanib qolgani tufayli tanzaniyalik bokschi nokautdan qutulib qoldi. Ammo uchinchi va to‘rtinchi raundlarda ham G‘oipovning kuchli zarbalarini o‘tkazib yuborib, polga qulagach, referi texnik nokaut e'lon qildi.

Shu tariqa, Mahmud G‘oipov professional boksdagi ilk jangidayoq nokaut bilan g‘alaba qozondi.

Havaskor boksda 69 kilogrammgacha bo‘lgan vazn toifasida ishtirok etgan Mahmud G‘oipov 2016 yilning fevralida Bolgariyadagi xalqaro turnirda g‘olib bo‘lgan, 2016-2018 yillarda «Uzbek Tigers» jamoasi safida musobaqalarda qatnashgan.