Ronaldu: «Messi ham A Seriyaga o‘tishini istayman»

«Yuventus» hujumchisi Krishtianu Ronaldudan «Barselona» sardori Lionel Messi bilan raqobati haqida fikr bildirishni so‘rashdi.

La Gazzetta dello Sport muxbirining: «Messini sog‘indingizmi?» qabilidagi savoliga Ronaldu quyidagicha javob berdi: «Yo‘q, ehtimol u meni sog‘ingandir!»

Shundan so‘ng portugaliyalik yulduz argentinalik hamkasbini A Seriyada ko‘rish istagi yo‘q emasligini bildirdi.

«Men Angliyada, Ispaniya va Italiyada, Portugaliyada va terma jamoada o‘ynab chiqdim, u esa hamon Ispaniyada. Balki men unga ko‘proq kerakdirman.

Men uchun, hayot – sinov demakdir. Bu sinovlar olami menga yoqadi, odamlarni baxtli qilishni yoqtiraman. U ham bir kun kelib Italiyaga kelishini, xuddi men kabi o‘zini sinov va qiyinchilikka urishini istagan bo‘lardim.

Shunday bo‘lsa-da, agar u o‘zini klubida baxtli his etayotgan bo‘lsa, bu tanlovini hurmat qilaman.

U – fantastik futbolchi va ajoyib yigit. Lekin men baribir hech narsani sog‘inayotganim yo‘q. Bu – mening yangi hayotim va unda baxtliman», - deb aytib o‘tdi Ronaldu.