Hindistonda harbiylar ikki mingdan ortiq sayyohni qutqarishdi

Hindiston armiyasi harbiylari mamlakat shimoli-sharqidagi Hind-Xitoy chegarasidagi tog‘da qolib ketgan 2,5 mingga yaqin sayyohni qutqarishdi, deb xabar berdi ANI agentligi.

Agentlikning xabar berishicha, sayyohlar harbiy xizmatchilarning kazarmalariga joylashtirilgan va barcha zarur narsalar bilan ta'minlangan.

Xabarda aytilishicha, Hindistonning Xitoy bilan chegarasidagi Natu-La dovonidan qaytayotgan, ichida sayyohlar bo‘lgan 300-400ta avtomobil tashqi dunyodan uzilib qolgan.

Qayd etilishicha, dovonda katta qalinlikda qor yog‘ishi sababli sayyohlar yo‘lida davom eta olmagan. Ayni paytda armiya texnikasi yordamida yo‘llar qordan tozalanmoqda.