Tramp Kim Chen In bilan yangi uchrashuvni kutayotganini ma'lum qildi

AQSh prezidenti Donald Tramp KXDR Davlat kengashi raisi Kim Chen In bilan yangi uchrashuvni intiqlik bilan kutayotgani haqida ma'lum qildi. Qo‘shma Shtatlar yetakchisi Twitter’dagi o‘z sahifasida tegishli yozuvni qoldirgan.

«Men ham KXDR Davlat kengashi raisi Kim Chen In bilan uchrashuvni intiqlik bilan kutyapman. U Shimoliy Koreya ulkan iqtisodiy salohiyatga ega ekanligini juda yaxshi tushunadi», - deya ma'lum qildi Tramp KXDR yetakchisi AQSh prezidenti bilan uchrashishga tayyor ekani haqidagi xabarlarga izoh berib.

Eslatib o‘tamiz, avvalroq Kim Chen In Tramp bilan muzokaralarda «boshqa yo‘l» izlashini ma'lum qilgandi.

Uning ma'lum qilishicha, Koreya yarim orolini yadrosizlantirish jarayonini davom ettirishga qat'iy bel bog‘lagan, biroq AQSh siyosati uni buning uchun «boshqa yo‘l» izlashga majbur qilishi mumkin.