G7 davlatlari Rossiyani ukrainalik dengizchilarni ozod qilishga chaqirdi

G7 davlatlari tashqi ishlar vazirlari Moskvani 2018 yil noyabrida Kerch bo‘g‘ozida chegarachilar tomonidan qo‘lga olingan ukrainalik dengizchilarni ozod qilishga chaqirishdi. Bu haqda "yettilik"ka a'zo davlatlar tashqi ishlar vazirlarining Dinar shahrida bo‘lib o‘tgan uchrashuvi yakuniy kommyunikesida aytiladi.

"Biz Rossiyaning Kerch bo‘g‘ozi va yondosh akvatoriyalarda Ukrainaga qarshi keskinlikni kuchaytirgan harakatlaridan qattiq tashvishdamiz. Biz Rossiyadan hibsga olingan ekipaj va kemalarni ozod qilishini hamda Kerch bo‘g‘ozi orqali kemalar o‘tishiga to‘sqinlik qilmasligini so‘raymiz", - deyiladi kommyunikeda.

"Yettilik" qatnashchilarining fikricha, "iqtisodiy sanksiyalarning davomiyligi Rossiya tomonidan Minsk kelishuvi bo‘yicha olingan barcha majburiyatlarga rioya qilinishiga bog‘liq". 

Eslatib o‘tamiz, avvalroq Kanada tashqi ishlar vazirligi Kerch bo‘g‘ozida Ukraina kemalarining ushlanishi va Qrim sababli Rossiyaning 114 fuqarosi va 15 ta kompaniyasiga qarshi sanksiyalar kiritgandi.