Buxorodagi yong‘in chiqqan gaz quvuridagi avariya oqibatlari bartaraf etildi

20 iyul kuni soat 21:50 da «Gazli – Chimkent» magistral gaz o‘tkazish quvurida avariya ro‘y berib, uning natijasida yong‘in kelib chiqqani haqida xabar bergan edik.

Kun.uz manbasi ma'lum qilishicha, Samarqand viloyati «Zirabuloq» DKSga qarashli diametri 1200 mm bo‘lgan «Gazli – Chimkent» magistral gaz o‘tkazish quvurining 76-kilometrida gaz sizib chiqqani sababli u yorilgan.

«O‘ztransgaz» AJning Kun.uz’ga ma'lum qilishicha, «Gazli – Chimkent» magistral gaz quvurida sodir bo‘lgan avariya oqibatlari 22 iyul kuni soat 12:00 atrofida to‘liq bartaraf qilingan va gaz quvurini havo-gaz aralashmasidan tozalash ishlari tugatilgan.

Bugun soat 15:30dan boshlab magistral gaz quvurini tabiiy gaz bilan qayta to‘ldirib, kerakli bosimgacha ko‘tarish va ishga qo‘shish ishlari olib borilmoqda. Qisqa fursatda mazkur gaz quvuridan avvalgidek foydalanish jarayoni boshlanadi.