Eron Britaniya tankerining ushlanishi tasvirlangan videoni namoyish etdi

Islom inqilobi qo‘riqchilari korpusi Britaniyaning Stena Impero tankeri ushlanishi videosini tarqatdi. Tasnim agentligi namoyish etgan videoda tanker yonida Eron bayrog‘i ostidagi katerlar suzayotgani, tankerga vertolyotdan harbiylar tushayotganini ko‘rish mumkin.

Tasvirda shuningdek, Eron harbiylarining F-236 Britaniya kemasi ekipaji bilan muzokaralari ham taqdim etilgan. Eronliklar operatsiya o‘tkazayotgani va tankerni nazoratga olganliklari haqida ogohlantirishgan. Britaniya harbiy kemasi ekipajiga vaziyatga aralashmaslik tavsiya qilingan.

Stena Impero tankeri ushlangan vaqtda Buyuk Britaniyaning F-236 Montrose fregati Hurmuz bo‘g‘ozida, tankerdan bir soatlik masofada bo‘lgan.  

Buyuk Britaniyaga qarashli tanker Islom inqilobi qo‘riqchilari korpusi tomonidan 19 iyulda ushlangandi. Tehronning ta'kidlashicha, tanker baliqchilik kemasi bilan to‘qnashgani va halokat signaliga javob bermagani uchun ushlangan.