Tramp AQShning Eron bilan "do‘stlashishi" shartini aytdi

Agarda Eron tinchlikka intilsa, AQSh u bilan do‘stlashishga tayyor, dedi Amerika prezidenti Donald Tramp.

"Eron rahbarlari boshqa davlatlarga tahdid qilishni bas qiladigan va o‘z mamlakatlari qurilishiga e'tibor beradigan vaqt keldi. Eron rahbarlari birinchi o‘ringa eronliklarni qo‘yadigan vaqt keldi. Amerika chin dildan tinchlik va hurmatga intiluvchi barcha bilan do‘stlashishga tayyor. Amerikaning bugungi do‘stlaridan ko‘pi qachonlardir asosiy dushmanlarimiz bo‘lgan. AQSh doimiy dushmanlar bo‘lishiga hech qachon ishonmagan", - dedi Tramp BMT bosh assambleyasida so‘zga chiqib.

Nyu-Yorkda 24 dan 30 sentyabrgacha BMT bosh assambleyasining 74-sessiyasi bo‘lib o‘tadi. 

Eslatib o‘tamiz, shu kunlarda Saudiya Arabistoni hukumati o‘z hududidagi neft obektlariga qilingan hujumlarga javoban har qanday chora qo‘llashga tayyorligini ma'lum qildi. Bundan tashqari, rasmiy Ar-Riyod bu hujumlar uchun mas'uliyatni Eron zimmasiga yuklamoqda. Tehron esa bu ayblov asossiz ekanini ta'kidlamoqda.