Isroilning butun dunyodagi diplomatik vakolatxonalari ishlashdan to‘xtadi

Isroilning barcha elchixona va konsulxonalari tashqi ishlar va moliya vazirliklari o‘rtasidagi kelishmovchilik oqibatida vujudga kelgan ish tashlashlar sababli o‘z ishini to‘xtatdi.

Isroil tashqi ishlar vazirligining bayonotiga ko‘ra, moliya vazirligi Isroilning xorijdagi elchilarini bir necha yillardan buyon amalda bo‘lib kelgan qoidalarga zid ravishda yangi qoidalar asosida ishlashga majbur qilmoqchi bo‘lgani sababli barcha diplomatik vakolatxonalar yopilgan. 

Ish tashlash davomida Isroilning xorijdagi vakolatxonalari hech qanday xizmat ko‘rsatmaydi.

2014 yil martda ham Isroilning barcha diplomatik vakolatxonalari, shuningdek, tashqi ishlar vazirligi ham o‘z ishini to‘xtatgandi. Isroillik diplomatlar hukumat va moliya vazirligidan mehnatga haq to‘lash sharoitlarini yaxshilashni talab qilgandi.