Исроилнинг бутун дунёдаги дипломатик ваколатхоналари ишлашдан тўхтади

Барча дипломатик ваколатхоналарнинг вақтинчалик ёпилишига Исроил ташқи ишлар ва молия вазирликлари ўртасидаги келишмовчилик сабаб бўлди.

Фото: РИА Новости

Исроилнинг барча элчихона ва консулхоналари ташқи ишлар ва молия вазирликлари ўртасидаги келишмовчилик оқибатида вужудга келган иш ташлашлар сабабли ўз ишини тўхтатди.

Исроил ташқи ишлар вазирлигининг баёнотига кўра, молия вазирлиги Исроилнинг хориждаги элчиларини бир неча йиллардан буён амалда бўлиб келган қоидаларга зид равишда янги қоидалар асосида ишлашга мажбур қилмоқчи бўлгани сабабли барча дипломатик ваколатхоналар ёпилган.

Иш ташлаш давомида Исроилнинг хориждаги ваколатхоналари ҳеч қандай хизмат кўрсатмайди.

2014 йил мартда ҳам Исроилнинг барча дипломатик ваколатхоналари, шунингдек, ташқи ишлар вазирлиги ҳам ўз ишини тўхтатганди. Исроиллик дипломатлар ҳукумат ва молия вазирлигидан меҳнатга ҳақ тўлаш шароитларини яхшилашни талаб қилганди.