Chexiyada kasalxonada sodir etilgan otishma oqibatida olti kishi halok bo‘ldi

Ostrava shahridagi kasalxonalardan birida noma'lum shaxs otishma sodir etishi natijasida olti kishi halok bo‘ldi. Bu haqda Chexiya politsiyasi xabar berdi.

Chexiya bosh vaziri Andrey Babishning ma'lum qilishicha, halok bo‘lganlar shifokor qabuliga kirish uchun navbat kutib o‘tirgan bemorlar bo‘lgan.  

Avvalroq politsiya mahkamasi mahalliy vaqt bilan ertalab soat yettilarda kasalxonada otishma sodir bo‘lgani to‘g‘risida ma'lumot kelib tushganini xabar qilgandi. 

iDNES.cz nashrining yozishicha, noma'lum shaxs travmatologiya bo‘limida o‘tirgan bemorlarga yaqin masofadan o‘q uzgan.  

Politsiyaning xabar berishicha, otishma sodir etgan shaxs qo‘lga olish chog‘ida o‘zini otib o‘ldirgan.