Jizzaxda egizak chaqaloqlar fermer dalasiga tashlab ketildi

Do‘stlik tumanining «Manas» qishloq fuqarolar yig‘inidagi ochiq daladan egizak chaqaloqlar jasadi topildi. Bu haqda Kun.uz`ga Jizzax viloyati IIB axborot xizmati xabar berdi.

Ushbu mahallada istiqomat qiluvchi O‘.R. «Oqoltin ostonasi ko‘rki» fermer xo‘jaligi hududidagi beton ariq yonida sumka ichida qora rangli polietilen paketga solingan o‘g‘il bola jinsiga mansub egizak chaqaloqlarni o‘lik holda topib olgan.

Shundan so‘ng hudud profilaktika inspektorining jamoat tartibini saqlash bo‘yicha yordamchisiga bu haqda ma'lum qilgan.

Ekspertiza xulosasiga ko‘ra, chaqaloqlar 20-21 haftalik kam vaznli bo‘lib tug‘ilgan.

Olib borilgan tezkor surishtiruv ishlari natijasida chaqaloqlarning onasi topildi. Norasidalarni 1998 yilda tug‘ilgan, «Manas» QFYda istiqomat qiluvchi, turmushga chiqmagan X.G. tug‘ib, tashlab ketgani aniqlandi.

Surishtiruv ishlari olib borilmoqda.

Tashlab ketilayotgan chaqaloqlar masalasida shariatning hukmi qanday? – imom domla bilan suhbat

Tayyorlagan: Шуҳрат Шокиржонов

#chaqaloq #Jizzax viloyati #Do‘stlik tumani