Koreyaga ishchi vizasi olib berish bilan bog‘liq firibgarlik fosh etildi

Jizzax viloyatida fuqaroni Koreyaga ishga jo‘natish va ishchi vizasini rasmiylashtirib berishni va’da qilgan shaxs tezkor tadbir davomida qo‘lga olindi.

Bosh prokuratura huzuridagi Departamentning Jizzax viloyati boshqarmasi xodimlari tomonidan o‘tkazilgan tezkor tadbirda fuqaro Q.Z. fuqaroni go‘yoki Migratsiya agentligida yuqori lavozimlarda ishlovchi tanishlari orqali Koreya davlatiga ishga yuborishini aytgani aniqlangan.

U 8 ming AQSh dollari evaziga ishchi vizasini rasmiylashtirib berish va Koreyada ishga joylashtirishni va’da qilib, oldindan 3 ming AQSh dollarini olgan vaqtida ashyoviy dalillar bilan ushlangan.

Mazkur holat yuzasidan Jinoyat kodeksining 25, 168-moddalari bilan jinoyat ishi qo‘zg‘atilib, hozirda tergov harakatlari olib borilmoqda.