Koronavirus sababli 363 mln bola maktabga bora olmayotgani ma'lum qilindi 

Koronavirus epidemiyasi sababli dunyo bo‘ylab 363 mln bola maktabga bora olmayapti. Bunday ma'lumotlarni YuNeSKOning Parijdagi qarorgohi xodimlari keltirishgan.

Parijda turli davlatlar ta'lim vazirlarining tezkor majlisi bo‘lib o‘tdi. Vazirlar epidemiya sababli yuzaga kelgan vaziyat, jumladan 15 ta davlatda maktablar to‘liq va 14 ta davlatda qisman yopilganini muhokama qilishgan. YuNeSKOda bunday vaziyatda masofadan o‘qitish dasturlarini tatbiq qilish kerakligi aytilgan.  

Shu munosabat bilan xalqaro tashkilot saytida ota-onalar, o‘qituvchilar va o‘quvchilar foydalanishi mumkin bo‘lgan onlayn-ta'lim dasturlari va platformalari ro‘yxati e'lon qilingan.