Ukrainada Ozarboyjon konsulligi o‘qqa tutildi

Konsullik binosiga olti marta o‘q uzilgan. Hujum qilganlar ikki nafar shaxs bo‘lgan.

Foto: Depositphotos / Valirin

Xarkovda noma'lum shaxslar Ozarboyjon konsulligi binosini o‘qqa tutishdi. Bu haqda konsullik matbuot xizmati xabar berdi.

«6 noyabrdan 7 noyabrga o‘tar kechasi Ozarboyjonning Xarkovdagi faxriy konsulligi binosi o‘qqa tutildi. Konsullik eshik va derazalariga olti marta o‘q uzildi. Hujum qilganlar ikki nafar shaxs bo‘lgan», — deyiladi xabarda.

Qayd etilishicha, voqea oqibatida hech kim jabrlanmagan.

Ozarboyjon tashqi ishlar vazirligi ushbu hodisani qoraladi va aybdorlarni javobgarlikka tortish uchun Ukraina huquqni muhofaza qilish organlari bilan hamkorlik qilishini bildirdi.

Ma'lum qilinishicha, holat yuzasidan jinoyat ishi qo‘zg‘atilgan.