Chexiyada jamoat joylarida birdaniga ikkita niqob taqish majburiy etib belgilandi

Sog‘liqni saqlash vaziri Yan Blatnining so‘zlariga ko‘ra, oxirgi kunlarda Chexiyada vaziyat yomonlashgan.

Foto: Reuters

Chexiya hukumati jamoat joylarida respirator yoki birdaniga ikkita tibbiy niqob taqishni majburiy etib belgiladi. Bu haqda iDNES nashri xabar bermoqda.

Endilikda do‘kon, jamoat transporti va shifoxonalarda FFP2 / KN95 / N95 respiratorini yoki birdaniga ikkita tibbiy niqob taqish lozim, dedi mamlakat sog‘liqni saqlash vaziri Yan Blatni.

"Oxirgi bir necha kunda Chex Respublikasida vaziyat yanada yomonlashdi", - dedi vazir.

Uning qo‘shimcha qilishicha, ushbu chora gavjum jamoat joylari uchun zarur hisoblanadi. Blatni avvalroq koronavirusning britancha shtammi tarqalishini to‘xtatish uchun imkon boricha ko‘proq odamlarni FFP2 respiratorini taqishga majbur qilish kerakligini aytgandi.