Armaniston muxolifati parlament binosini to‘sib oldi

Armanistonda bir necha yuz namoyishchi “Vatan uchun harakat” muxolif partiyasi yetakchisi Vazgen Manukyan chaqirig‘iga ko‘ra parlament binosiga kirish-chiqishni to‘sib oldi.

Foto: eadaily.com

“Interfaks” muxbirining xabar berishicha, namoyishchilar parlamentga Demirchyan ko‘chasi tomonidan kirish oldida ikkita chodir o‘rnatishgan. Bu yerdan parlamentga odatda parlament spikeri, parlament rahbariyati, bosh vazir avtomobillari kirib chiqadi.

Voqea joyida bo‘lgan bir necha yuz politsiyachi va maxsus xodimlar bunga qarshi hech qanday faol harakatlarni amalga oshirmayapti.

Ta'kidlanishicha, parlamentga Bagramyan ko‘chasi orqali kirish va chiqish joylari 25 fevraldan namoyishchilar tomonidan to‘sib qo‘yilgan. Shu tariqa, parlamentga barcha kirish-chiqish joylari to‘liq to‘silgan.

Avvalroq muxolifat namoyishida Vazgen Manukyan “parlament deputatlar xalq talabini (muxolifatning bosh vazir Nikol Pashinyanning iste'foga chiqishi talabi) qabul qilish uchun kelsagina, ishlashini” aytgan.