Birjada benzin narxi yana ko‘tarildi

O‘tgan hafta davomida, ya'ni 3–9 may kunlari "O‘zbekiston respublika tovar-xomashyo birjasi" AJning barcha savdo platformalarida 1,7 trln so‘mlik tovarlar sotilgan bo‘lib, bu avvalgi haftaga nisbatan 5,5 foizga kam.

Foto: KUN.UZ

Birjada avtomobil benzini deyarli o‘zining boshlang‘ich qiymatida sotildi. Shakllangan o‘rtacha narx va benzinning sotuvchi-korxonalari tomonidan mustaqil ravishda o‘rnatiladigan boshlang‘ich narxlar o‘rtasidagi tafovut 0,4 foizni tashkil qilgan.

O‘tgan haftada birja savdolariga 30 291,0 tonna AI-80 markali avtomobil benzini qo‘yildi va ulardan 18 348,3 tonnasi, ya'ni 60,6 foizi sotildi.

Ko‘rib chiqilayotgan davrda sotuvchi-korxonalar AI-80 markali avtomobil benzinining o‘rtacha boshlang‘ich narxlarini mahsulotning bir tonnasi uchun 6,5 mln so‘mdan 6,6 mln so‘mgacha yoki 2,7 foizga ko‘tardi.

Shu munosabat bilan, AI-80 markali avtomobil benzinining o‘rtacha kunlik narxi ham mos tarzda 6,51 mln so‘mdan 6,69 mln so‘mgacha, ya'ni 2,8 foizga, sotuvchilarning boshlang‘ich narxlarni ko‘tarishi hisobiga o‘sdi.

Ko‘rib chiqilayotgan davrda AI-80 rusumli avtomobil benzinining o‘rtacha haftalik kotirovkasi 6,61 mln so‘mni, AI-91 – 7,66 mln so‘mni tashkil etdi.

Prezidentning 2020 yil 4 apreldagi qaroriga muvofiq, “O‘zbekneftgaz” AJ tasarrufidagi Buxoro neftni qayta ishlash zavodi tomonidan birja savdolariga qo‘yiladigan avtomobil benzinining boshlang‘ich narxlari jahon birjalardagi Brent nefti kotirovkalaridan kelib chiqib, shakllanadi.