Биржада бензин нархи яна кўтарилди

Ўтган ҳафта давомида, яъни 3–9 май кунлари "Ўзбекистон республика товар-хомашё биржаси" АЖнинг барча савдо платформаларида 1,7 трлн сўмлик товарлар сотилган бўлиб, бу аввалги ҳафтага нисбатан 5,5 фоизга кам.

Фото: KUN.UZ

Биржада автомобил бензини деярли ўзининг бошланғич қийматида сотилди. Шаклланган ўртача нарх ва бензиннинг сотувчи-корхоналари томонидан мустақил равишда ўрнатиладиган бошланғич нархлар ўртасидаги тафовут 0,4 фоизни ташкил қилган.

Ўтган ҳафтада биржа савдоларига 30 291,0 тонна АИ-80 маркали автомобил бензини қўйилди ва улардан 18 348,3 тоннаси, яъни 60,6 фоизи сотилди.

Кўриб чиқилаётган даврда сотувчи-корхоналар АИ-80 маркали автомобил бензинининг ўртача бошланғич нархларини маҳсулотнинг бир тоннаси учун 6,5 млн сўмдан 6,6 млн сўмгача ёки 2,7 фоизга кўтарди.

Шу муносабат билан, АИ-80 маркали автомобил бензинининг ўртача кунлик нархи ҳам мос тарзда 6,51 млн сўмдан 6,69 млн сўмгача, яъни 2,8 фоизга, сотувчиларнинг бошланғич нархларни кўтариши ҳисобига ўсди.

Кўриб чиқилаётган даврда АИ-80 русумли автомобил бензинининг ўртача ҳафталик котировкаси 6,61 млн сўмни, АИ-91 – 7,66 млн сўмни ташкил этди.

Президентнинг 2020 йил 4 апрелдаги қарорига мувофиқ, “Ўзбекнефтгаз” АЖ тасарруфидаги Бухоро нефтни қайта ишлаш заводи томонидан биржа савдоларига қўйиладиган автомобил бензинининг бошланғич нархлари жаҳон биржалардаги Brent нефти котировкаларидан келиб чиқиб, шаклланади.