Ukrainada Rossiya va Belarusdan elektr energiyasi olish taqiqlandi

Ukraina energetika va kommunal xizmatlar sohasini muvofiqlashtirish milliy komissiyasi Rossiya va Belarusdan elektr energiyasi importini taqiqladi. Bu haqda «Yevropeyskaya solidarnost» fraksiyasi deputati Aleksey Goncharenko o‘z Telegram-kanalida ma'lum qildi.

Uning yozishicha, bu mamlakatlardan Ukrainaga elektr energiyasi importi 2021 yil 1 oktyabrgacha taqiqlangan.

Avvalroq Ukraina energetika vaziri German Galushchenko Rossiya va Belarusdan elektr energiyasi import qilinishini taqiqlashni so‘rab milliy komissiyaga murojaat qilgandi.

Uning so‘zlariga ko‘ra, bu mamlakatlardan energiya import qilinishi Ukrainaning energetika sohasidagi strategik maqsadlariga zid bo‘lib, energetika xavfsizligiga tahdid soladi.

13 may kuni Ukraina prezidenti Vladimir Zelenskiy Rossiya va Belarusdan elektr energiyasi import qilinishini cheklash ko‘zda tutilgan qonunni imzolagandi.