Toliblar Afg‘onistonda demokratik tuzum o‘rnatilmasligini ma'lum qildi

Vohidulla Hoshimiyning so‘zlariga ko‘ra, mamlakatda demokratiya uchun asos yo‘q va bu yerda qabul qilinadigan yagona siyosiy tuzum shariat qonunlari bo‘ladi.

Foto: Reuters

«Tolibon» harakati Afg‘onistonda demokratik tuzum o‘rnatmaydi, dedi harakatning yuqori martabali a'zolaridan biri Vohidulla Hoshimiy Reuters agentligiga.

Uning so‘zlariga ko‘ra, mamlakatda demokratiya uchun asos yo‘q va bu yerda qabul qilinadigan yagona siyosiy tuzum shariat qonunlari bo‘ladi.

Hoshimiy Afg‘onistonni «Tolibon» boshqaruv kengashi boshqarishi, Haybatulla Oxundzoda oliy yetakchi bo‘lishi mumkinligini aytdi.

U shuningdek, yangi milliy armiya tuzish rejasi haqida so‘z yuritib, armiya safiga hukumat qo‘shinlari harbiylari ham qo‘shilishi mumkinligini bildirdi.

Avvalroq toliblar matbuot anjumani o‘tkazib, Afg‘onistonda qonun va tartib hukmron bo‘lishi, hech kimdan qasos olinmasligi va ayollarning shariatdagi huquqlari himoya qilinishini ma'lum qilgandi.

#Afg‘oniston #tolibon