Sudga murojaat qilishda «yagona darcha» tartibi joriy etiladi

Shunday tartib o‘rnatiladiki, unga ko‘ra bir sud ishi doirasida ba'zilari ma'muriy sudga, boshqalari esa fuqarolik ishlari bo‘yicha sudga taalluqli bo‘lgan bir nechta talabni birlashtirishga yo‘l qo‘yilmaydi.

Ma'muriy sudning qonuniy kuchga kirgan hal qiluv qarorida aniqlangan holatlar boshqa ishni ko‘rayotgan fuqarolik ishlari bo‘yicha sud uchun majburiy hisoblanadi.

Jismoniy va yuridik shaxslarga odil sudlovga erishishda imkoniyatlarni kengaytirish maqsadida 2023 yil 1 yanvardan boshlab sudga murojaat qilishda “yagona darcha” tartibi joriy etiladi.

Bunda, da'vo arizalari, arizalar hamda shikoyatlarni sudga bevosita topshirishdan tashqari davlat xizmatlari markazlari orqali ham taqdim etish imkoniyati yaratiladi hamda ularni ko‘rib chiqish holati fuqaro va tadbirkorlik sub'yektlari tomonidan masofadan turib onlayn tarzda kuzatib boriladi.

Sudlar tomonidan da'vo arizasi, ariza hamda shikoyatni sudga taalluqli bo‘lmaganligi sababli qabul qilishni rad etish yoki ish bo‘yicha ish yuritishni tugatish taqiqlanadi hamda da'vo arizasi, ariza, shikoyat yoki ish uni ko‘rib chiqishga vakolatli sudga o‘tkaziladi (boshqa davlat organi yoki tashkilot vakolatiga kirgan hollar bundan mustasno).

Adliya vazirligi 2022 yil 1 dekabrga qadar fuqaro va tadbirkorlik sub'yektlariga ularning da'vo arizasi, ariza va shikoyatlarini ko‘rib chiqish holatini masofadan turib onlayn kuzatib borish uchun maxsus kodni “SMS” xabar orqali yuborish tizimini yo‘lga qo‘yadi.