Lukashenko Yevropaga gaz tranzitini to‘xtatib qo‘yish bilan tahdid qildi

Belarus prezidenti Aleksandr Lukashenko G‘arbning yangi sanksiyalariga javoban Yevropaga gaz tranzitini to‘xtatib qo‘yish bilan tahdid qildi.

“Polsha chegarani yopish bilan qo‘rqitmoqchi. Marhamat, yoping: u yerga kamroq qochqinlar boradi. Gap bunda emas”, – deya Lukashenkoning so‘zlaridan iqtibos keltiradi BelTA agentligi.

“Belarus orqali tranzitni yopib qo‘ysak-chi? Ukraina orqali o‘tmaydi: Rossiya chegarasi yopiq. Boltiqbo‘yi orqali yo‘l yo‘q. Polyaklar va masalan, nemislarga yopib qo‘ysak nima bo‘ladi? Bizni o‘z suverenitetimiz va mustaqilligimizni himoya qilishda hech narsa to‘xtata olmasligi kerak”, – dedi u.

Belarus orqali Yamal-Yevropa transmilliy magistral eksport gaz quvuri o‘tgan, deya qayd etdi Lukashenko.

“Biz Yevropani isityapmiz, ular esa chegarani yopish bilan tahdid qilishyapti. U yerga tabiiy gaz berilishini yopib qo‘ysak-chi? Shuning uchun Polsha, Litva rahbariyati va boshqa boshi yo‘qlarga gapirishdan oldin o‘ylashni maslahat beraman”, – dedi u.

Belarus va YeI mamlakatlari chegarasidagi migratsion inqiroz yozda, Belarus prezidenti Aleksandr Lukashenko noqonuniy migrantlar oqimiga qarshi kurashmasligini aytganidan so‘ng yuzaga kelgandi.

Polsha chegara xizmatida ta'kidlanishicha, 8 noyabrdan beri respublika chegarasi yaqinida 2-4 minggacha muhojir to‘plangan. Ular Yevropa Ittifoqi hududiga o‘tishga harakat qilmoqda.