AQSh ham Putinga qarshi personal sanksiya e’lon qildi

Foto: Reuters

Rossiya prezidenti Vladimir Putin Britaniya va Yevropa Ittifoqidan keyin AQSh sanksiyasiga uchradi. Bu haqda Oq uy rasmiy vakili Jyen Psaki ma’lum qildi.

«Yevropadagi ittifoqchilarimizga xayrixoh tarzda Rossiya prezidenti Putin, tashqi ishlar vaziri Lavrov va Rossiya Xavfsizlik kengashi a’zolariga nisbatan sanksiya e’lon qilamiz», dedi Psaki. Sanksiya sabab Putinga AQShga kirish taqiqlanadi.

Oq uy rasmiy vakili AQSh Rossiya bilan urushishni maqsad qilmaganini aytdi. Shuningdek, AQSh ehtiyoj tug‘ilgan taqdirda ukrainalik qochoqlarni qabul qilishga tayyorligini bildirdi.

Oldinroq Britaniya va Yevropa Ittifoqi Putin hamda Lavrovga qarshi sanksiya e’lon qilgandi. Rossiya Ukrainaga bostirib kirguniga qadar hech bir davlat Putinga qarshi personal sanksiya qo‘llamagan.