Rossiyada 134,5 ming kishi armiyaga chaqiriladi

Farmon matni Rossiya rasmiy huquqiy axborot portalida e’lon qilingan. Unda yozilishicha, chaqiruv 1 apreldan 15 iyulgacha davom etadi. Uch oy davomida 134 ming 500 nafar 18 yoshdan 27 yoshgacha bo‘lgan rossiyaliklar armiyaga chaqiriladi.

Rossiya mudofaa vaziri Sergey Shoygu bu yil o‘tgan yilgiga qaraganda kamroq odam armiyaga chaqirilishini aytgandi. O‘tgan yil 135 ming 650 kishi bahorgi chaqiruv doirasida armiyaga chaqirilgan. Rossiya mudofaa vaziriga ko‘ra, armiyaga chaqirilganlar hech qanday «qaynoq hududlarga» yuborilmaydi. Xizmatni yakunlaganlar zaxiraga olinib, yashash manzillariga jo‘natib yuboriladi.

Rossiya bosh shtabi rahbarining o‘rinbosari Yevgeniy Burdinskiyning ta’kidlashicha, bahorgi armiyaga chaqiruv Ukrainadagi harbiy harakatlar bilan bog‘liq emas, ularda faqat shartnoma asosida xizmat qiladigan harbiylar ishtirok etadi. Avvalroq Rossiya mudofaa vazirligi muddatli harbiy xizmatchilarning Ukrainadagi harbiy harakatlarda ishtirok etgani bilan bog‘liq holatlar kuzatilganini ma’lum qilgan, Putin bu holat bo‘yicha tekshiruv o‘tkazishga buyruq bergandi.