Fransiyaning Tuluza shahrida «O‘zbek bog‘i» ochildi

O‘zbekiston va Fransiya o‘rtasida diplomatiya munosabatlari o‘rnatilganining 31 yilligi tadbirlari doirasida Tuluza shahridagi botanika bog‘i hududida «O‘zbek bog‘i» tashkil etildi, deb xabar bermoqda «Dunyo».

Foto: Dunyo

Tuluza botanika bog‘i shahar markazidagi 3 gektar maydonda barpo etilgan. Unda dunyoning turli mintaqalaridan olib kelingan noyob ko‘chatlar ekilgan.

«O‘zbek bog‘i» botanika bog‘ining 400 kv metr maydonida yaratildi. Bog‘ hududida O‘zbekistondan olib kelingan noyob ko‘chatlar, jumladan, Turkiston chinori, Turkiston do‘lanasi, olchasimon olxo‘ri, bodom, gilos va o‘rik ko‘chatlari ekildi.

Ma’lumot o‘rnida shuni ham qayd etish joizki, 2019 yili Fransiyaning Ruey Malmezon shahrida Buxoro viloyati hokimligi ko‘magida «O‘zbek bog‘i» yaratilgan edi.

Avvalroq O‘zbekiston va Fransiya o‘rtasida hududlararo diplomatiyani rivojlantirish doirasida Tuluzada joylashgan Fransiya Fuqarolik milliy aviatsiyasi instituti hududida buyuk astronom olim, matematik va davlat arbobi Mirzo Ulug‘bek haykali ochilgandi.