Ekspertlar: Ekologik inqirozlar aholi salomatligiga tahdid solyapti

Ekologik inqirozlardan fuqarolarning sog‘lig‘iga tahdid ortib bormoqda, deya ogohlantiradi Germaniya hukumatining Atrof-muhit bo‘yicha ekspertlar kengashi. 19 iyun, dushanba kuni e’lon qilingan hisobotda u atrof-muhit va sog‘liqni saqlash bo‘yicha yanada integratsiyalashgan siyosatga chaqirdi. 

Mutaxassislar Jahon sog‘liqni saqlash tashkiloti (JSST) ma’lumotlarini keltirmoqda. Unga ko‘ra, Yevropada o‘limning taxminan 15 foizi ekologik xavflar tufayli yuzaga keladi. Havoning zararli moddalar, xususan, mayda chang bilan ifloslanishi sog‘liq uchun alohida xavf tug‘diradi. 

«Mayda chang nafas olish kasalliklarining rivojlanishiga hissa qo‘shadi, shuningdek, yurak-qon tomir tizimi va boshqa organlar tizimlariga ham ta’sir qilishi mumkin», deyiladi Germaniya sog‘liqni saqlash vaziri Karl Lauterbax va Germaniya atrof-muhit vaziri Shteffi Lemkega berilgan hisobotda. 

Havoning mayda chang bilan ifloslanishining asosiy manbalari, ta’kidlanganidek, transport, shuningdek, sanoat va uyda yonish jarayonlari hisoblanadi. Ma’lumotlarga ko‘ra, fuqarolarning ijtimoiy himoyalanmagan toifalari ayniqsa kasallanish xavfi ostida. Ular transport shovqini va ifloslantiruvchi moddalardan nomutanosib ravishda ta’sirlanadi. 

«Shaharsozlikda atrof-muhitni muhofaza qilish sog‘liqni saqlash bo‘limlarini faolroq jalb qilishni va jamoatchilikning faol ishtirokini, shuningdek federal va hududiy darajada moliyaviy yordamni talab qiladi», dedi kengash a’zosi Volfgang Kyok.