Serdar Berdimuhamedovga Turkmaniston qahramoni unvoni berildi

Turkmaniston prezidenti Serdar Berdimuhamedov Turkmaniston Qahramoni unvoni bilan taqdirlandi.

24 sentabr kuni Xalq Maslaxati yig‘ilishida Serdar Berdimuhamedovga Turkmaniston Qahramoni unvonini topshirishga bag‘ishlangan tantanali marosim bo‘lib o‘tdi.

Tadbirda mamlakat milliy parlamenti spikeri Dunyogo‘zal Gulmanova Turkmaniston Majlisining «Turkmaniston prezidenti Berdimuhamedov Serdar Gurbanguliyevichga Turkmaniston Qahramoni unvonini berish to‘g‘risida»gi qarorini o‘qib eshittirdi.

Qayd qilinishicha, davlat rahbari Turkmaniston milliy mustaqilligi asoslarini, mamlakat betarafligi tamoyillarini mustahkamlashga qo‘shgan ulkan shaxsiy hissasi, davlatni jadal rivojlantirish, xalqaro nufuzini mustahkamlashdagi alohida xizmatlari uchun Turkmaniston Qahramoni unvoni bilan taqdirlangan.

Serdar Berdimuhamedov 2022 yil mart oyida Turkmaniston prezidenti bo‘ldi. Shu paytgacha «Mustaqil Turkmanistonga buyuk muhabbati uchun» ordeni, shuningdek, «Turkmaniston mustaqilligining 25 yilligi», «Turkmaniston neytralitetining 25 yilligi» medallari bilan taqdirlangan.