Oliy Rada Uitkoffni Ukraina muzokaralaridan chetlatishga chaqirdi

Oliy Radaning tashqi siyosat va parlamentlararo hamkorlik qo‘mitasi rahbari Oleksandr Merejko AQSh prezidenti Donald Trampning maxsus vakili Stiven Uitkoffni Ukrainadagi mojaroni hal qilish bo‘yicha muzokaralarda ishtirok etishdan chetlatishni talab qildi. Bu haqda «Strana» yozdi.

Ukrainalik deputat amerikalik jurnalist Taker Karlsonga bergan intervyusidagi Uitkoff bayonotlarini «sharmandali va hayratlanarli» deb atadi.

«Gap bu masalada professional bo‘lishi va ba’zi asosiy narsalarni bilishi kerak bo‘lgan prezident vakili haqida bormoqda. U buni bilmaydi. U kimning vakili? Trampning vakilimi yo Putinning? U rus propagandasini takrorlamoqda», deb izoh berdi Merejko Uitkoffning so‘zlariga.

Ukrainalik deputatga ko‘ra, Tramp o‘z maxsus vakilining bayonotlarini rad qilishi kerak, chunki «ular AQSh siyosatiga zid».

Karlson bilan suhbatda Stiven Uitkoff Ukrainadagi vaziyat yuzasidan bir qator bayonotlar berdi. Xususan, Ukraina hukumati mamlakatda saylov o‘tkazishga rozi bo‘lganini ma’lum qildi. Bundan tashqari, Uitkoff Ukraina prezidenti Vladimir Zelenskiy va uning apparati rahbari Andrey Yermak Ukrainaning NATO a’zosi bo‘lolmasligiga «tan berganini» ta’kidladi. Trampning maxsus vakili Ukraina mojarosini hal qilishda yetakchi masala sifatida Rossiya yangi mintaqalarining xalqaro maqomini aytdi.