Samarqanddagi sammit sabab ba’zi talabalarga qisqa muddatli ta’til beriladi

3–5 aprel kunlari Samarqand shahrida «Markaziy Osiyo—Yevropa ittifoqi» sammiti o‘tkaziladi.

Oliy ta’lim, fan va innovatsiyalar vazirligining rasmiy xabariga ko‘ra, «Markaziy Osiyo – Yevropa Ittifoqi» birinchi rasmiy sammiti yuqori saviyada o‘tkazilishi hamda xavfsizlikni ta’minlash maqsadida shaharda transport harakatlanishini qisqartirish va cheklash choralari ko‘riladi.

Shu munosabat bilan 1–5 aprel kunlari quyidagi oliy ta’lim muassasalari hamda ular huzuridagi texnikum va akademik litseylarga yozgi ta’til hisobidan qisqa muddatli o‘quv ta’tili beriladi:

1. Samarqand davlat universiteti;

2. Samarqand davlat chet tillar instituti;

3. Samarqand iqtisodiyot va servis instituti;

4. «Ipak yo‘li» turizm va madaniy meros xalqaro universiteti;

5. Toshkent axborot texnologiyalari universiteti Samarqand filiali;

6. Samarqand davlat tibbiyot universiteti;

7. O‘zbekiston-Finlandiya pedagogika instituti;

8. Samarqand davlat tibbiyot universiteti akademik litseyi;

9. Samarqand davlat universiteti akademik litseyi;

10. Abu Ali ibn Sino nomidagi Siyob jamoat salomatligi texnikumi.

O‘quv jarayonlari 7 aprel, dushanba kundan boshlanadi. Vazirlikka ko‘ra, bu oliygoh talabalari uchun qoldirilgan dars mashg‘ulotlari yozgi ta’tilning ilk kunlari hisobidan o‘tkaziladi.

Eslatib o‘tamiz, avvalroq Samarqandda o‘tkaziladigan «Markaziy Osiyo — Yevropa Ittifoqi» birinchi sammiti munosabati bilan shaharga kirish yo‘llari vaqtinchalik yopilishi xabar qilingan.

3, 4 va 5 aprel kunlari viloyat hududidan tranzit o‘tuvchi transport vositalari uchun aylanma harakat tashkil etiladi. Haydovchilar uchun maxsus flayerlar ishlab chiqilgan bo‘lib, uni QR-kod yordamida mobil ilova orqali ham ko‘rish mumkin.