Samarqandda erkak mashinasini stadionda odamlar ustiga haydadi

Nurobod tumanidagi maktabda joylashgan futbol maydonida Nexia haydovchisi mashinasini odamlar ustiga haydagan. YHXX axborot xizmatining Kun.uzʼga ma’lum qilishicha, holat yuzasidan tergovga qadar tekshiruv harakatlari olib borilmoqda.

Foto: Videodan kadr

Viloyat YHXBning ma’lum qilishicha, yigit futbolda jamoasining yutqazgani alamidan mashinasida stadionga chiqib, odamlar ustiga bostirib borgan.

Mazkur haydovchi va mashina topilgan. Haydovchiga tegishli tartibda ma’muriy bayonnoma rasmiylashtirilgan, mashinasi esa jarima maydonchasiga joylashtirilgan.

YHXB e’lon qilgan videoda yigit qilgan ishidan pushaymonligini aytib, uzr so‘ragan.

Eslatib o‘tamiz, shunga o‘xshashroq holat o‘tgan yili Sirdaryoda ham sodir bo‘lgandi. O‘shanda stadionda 29 yoshli erkak Captiva'sini odamlar ustiga haydagandi. Keyinroq uning o‘zi 4,5 yilga qamaldi, mashinasi esa musodara qilindi.