Zargarlik sohasini qo‘llab-quvvatlashga 100 mlrd so‘m ajratiladi

Hujjatning asosiy maqsadlari:

• qimmatbaho metallarni qayta ishlashning yillik hajmini 7 tonnaga, zargarlik buyumlarini eksport qilish ko‘rsatkichlarini 300 mln AQSh dollariga yetkazish;
• qimmatbaho metallar va zargarlik buyumlarining norasmiy aylanmasini kamida 50 foizga qisqartirish;
• zargarlik buyumlarini ishlab chiqarish faoliyatini sanoat darajasiga olib chiqish, jumladan xalqaro bozorlarda raqobatbardosh mahsulot ishlab chiqarilishini qo‘llab-quvvatlash;
• zargarlik buyumlarini ishlab chiqarish va realizatsiya qilish sohasida samarali nazorat tizimini joriy etish.

Xususan, sohani qo‘llab-quvvatlash uchun davlat budjetidan 100 mlrd so‘m ajratiladi.

2025 yil 15 iyuldan boshlab:

• lizing tashkilotlari ajratilgan kredit liniyasi hisobidan zargarlik sanoatida ishlatiladigan asbob-uskuna, ehtiyot qismlar va butlovchi buyumlarni 2 yillik imtiyozli davr bilan 5 yilgacha muddatga MBning asosiy stavkasida, foizlarni qarzdorlik qoldiq qismiga hisoblash tartibida lizingga beradi;
• belgilangan ro‘yxatlar bo‘yicha olib kiriladigan va O‘zbekistonda ishlab chiqarilmaydigan asbob-uskunalar, ehtiyot qismlari, butlovchi buyumlar va sarflov vositalari 2028 yil 1 iyulgacha bojxona bojidan ozod etiladi;
• «Navoiy KMK» AJ va «Olmaliq KMK» AJ tomonidan qimmatbaho metallarni to‘g‘ridan-to‘g‘ri shartnoma asosida va kechiktirib to‘lash sharti bilan sotish tartibi 2030 yil 1 yanvargacha uzaytiriladi.