Raqamli kriminalistika sohasidagi mutaxassislar yagona reyestri tuziladi

Vazirlar Mahkamasining "Raqamli kriminalistika tadqiqotlari sohasida mutaxassislar malakasini oshirish va sertifikatlangan mutaxassislarning yagona elektron reyestrini yuritish tartibini joriy etish chora-tadbirlari to‘g‘risida"gi qarori qabul qilindi.

Foto: 123RF

Ushbu hujjat prezident qarorining PQ–17-sonli «Raqamli texnologiyalar vositasida sodir etiladigan jinoyatlarga qarshi kurashish sohasi uchun professional kadrlar tayyorlash tizimini joriy etish chora-tadbirlari to‘g‘risida»gi farmoyishini amalga oshirish maqsadida ishlab chiqilgan.

Qarorga muvofiq:

raqamli kriminalistika sohasidagi mutaxassislarning malakasi kamida har ikki yilda bir marta ixtisoslashtirilgan o‘quv muassasalarida oshiriladi;
o‘qitish oflayn va masofaviy shakllarda – kurslar, seminarlar va stajirovkalar ko‘rinishida o‘tkazilishi mumkin;
o‘qitishning minimal vaqti – 36 akademik soatni tashkil etadi;
o‘qishni muvaffaqiyatli yakunlagan mutaxassislarga belgilangan namunadagi sertifikatlar beriladi;
xorijda o‘qitilgan mutaxassislarning malakasi tegishli hujjatlar asosida tan olinadi.

Shuningdek, raqamli kriminalistika sohasida sertifikatlangan mutaxassislarning yagona elektron reyestrini markazlashgan holda yuritish nazarda tutilgan.