Koreya va Slovakiyaga ish va’dasi - Namanganda ikki firibgarlik fosh etildi

Namanganda ishga joylashtirib berish bahonasida pul undirishga urinish bo‘yicha ikki holat fosh etildi: xususiy bandlik agentligiga aloqador norasmiy xodim va turistik firma rahbari tezkor tadbir paytida ashyoviy dalillar bilan ushlandi.

Foto: DXX

Davlat xavfsizlik xizmati va Iqtisodiy jinoyatlarga qarshi kurashish departamenti hamkorligida o‘tkazilgan tezkor-qidiruv tadbirlari natijasida Namanganda ishga joylashtirish nomi bilan amalga oshirilgan ikki firibgarlik epizodi aniqlandi.

1-epizod (Janubiy Koreya):
Namangan shahridagi xususiy bandlik agentligining norasmiy ishchisi To‘raqo‘rg‘on tumanida yashovchi to‘rt fuqaroning ishonchiga kirib, “tanishlari orqali” ularni Janubiy Koreyaga ishga yuborish evaziga 2 000 AQSh dollari talab qilgan. U oldindan 1 000 AQSh dollarini olgan vaqtida tezkor xodimlar tomonidan ashyoviy dalillar bilan ushlandi.

2-epizod (Slovakiya):
Namangan shahrida faoliyat yurituvchi turistik firma rahbari o‘z hamshaharini “mansabdor tanishlari orqali” Slovakiyaga ishga joylashtirish evaziga 40 mln so‘m talab qilgan. U viza chiqarib berish bahonasida 600 AQSh dollari va 2,8 mln so‘m ni qabul qilayotganda ushlangan. Ta’kidlanishicha, mazkur shaxs muqaddam firibgarlik bilan bog‘liq jinoyat uchun sudlangan bo‘lsa-da, xulosa chiqarmagan.

Har ikki holat yuzasidan shaxslarga nisbatan O‘zbekiston Jinoyat kodeksining 168-moddasi 1-qismi (firibgarlik) bilan jinoyat ishlari qo‘zg‘atilgan, tergov harakatlari olib borilmoqda.