2026 yildan arxiv xizmatlari uchun talab etiladigan hujjatlar qisqaradi

2026 yildan arxiv xizmatlarini ko‘rsatishda ortiqcha hujjatlar talab qilish bosqichma-bosqich bekor qilinadi, ayrim xizmatlar bo‘yicha ko‘rsatish muddatlari esa bir necha martaga qisqartiriladi. Bu fuqarolar va tashkilotlar uchun arxiv bilan ishlash jarayonini ancha yengillashtiradi.

Foto: iStock

Prezident farmoniga ko‘ra, 2026 yil 1 maydan arxiv xizmatlarini ko‘rsatishda quyidagi hujjatlarni talab qilish bekor qilinadi, jumladan:

talabgorlarni arxiv hujjatlarini tartibga keltirishga kompetentligi yuzasidan attestatsiyadan o‘tkazishda tegishli arxiv muassasasi yoki tashkilot rahbarining tavsiya xati;
mavzuli so‘rovlar to‘g‘risida ma’lumotnoma berishda so‘ralayotgan hujjatning nusxasi.

Shuningdek, 2026 yil 1 martdan qator arxiv xizmatlarini ko‘rsatish muddatlari qisqartiriladi:

arxiv hujjatlari yoki ularning ko‘chirma nusxalarini O‘zbekistondan tashqariga vaqtincha olib chiqish uchun ruxsatnoma berish muddati 15 ish kunidan 5 ish kunigacha;
yaroqsiz holatga kelgan yoki yo‘qotilgan mehnat daftarchasidagi yozuvlarni tasdiqlash muddati 20 ish kunidan 10 ish kunigacha;
oliy va o‘rta-maxsus ta’lim muassasasida o‘qiganlikni tasdiqlash haqidagi arxiv ma’lumotnomasini berish muddati 5 ish kunidan 2 ish kunigacha;
arxiv hujjatlari, kitoblar va qo‘lyozmalarni raqamlashtirish (elektron nusxa olish) muddati 3 ish kunidan 1 ish kunigacha.

Ushbu o‘zgarishlar arxiv xizmatlarining tezkorligi va qulayligini oshirish, fuqarolar va tashkilotlar zimmasidagi byurokratik yukni kamaytirishga qaratilgan.