Germaniyadagi sud RFning “soyadagi floti” tankerini musodara qilishni taqiqladi

Yil boshida Boltiq dengizida avariyaga uchragan va Rossiya Federatsiyasining “soya floti”ga tegishli deb baholanayotgan Eventin neft tankeri, shuningdek undagi 100 ming tonna neft yuki Germaniyaning Myunxen shahridagi federal moliya sudi (Bundesfinanzhof, BFH) qaroriga muvofiq nemis bojxonasi tomonidan musodara qilinmasligi kerak. Bu haqda 11 dekabr, payshanba kuni Süddeutsche Zeitung gazetasi xabar berdi. Nashr aniqlashicha, Germaniyaning eng yuqori soliq sudi kema egasining vaqtinchalik sud taqiqi (musodara qilishni to‘xtatib turish)ni joriy etish haqidagi iltimosnomasini qanoatlantirgan. Shuningdek, ushbu holatda xalqaro huquq ham amal qiladi: unga ko‘ra avariyaga uchragan kemalar xavfsiz “panoh porti”dan foydalanishi mumkin.

Hozircha Eventin va uning yuki Yevropa Ittifoqi hududini tark eta oladimi-yo‘qmi, degan savol ochiq qolmoqda. Frankfurter Allgemeine Zeitung yozishicha, keyingi huquqiy tortishuvlar yillab cho‘zilishi mumkin. Nashr manbalarining ma’lum qilishicha, keyingi harakatlar bo‘yicha yakuniy qaror, ehtimol, Germaniya kansleri Fridrix Mersga bevosita bog‘liq bo‘ladi. Tankerda katta hajmda saqlanayotgan neftni olish masalasi ham bahsli bo‘lib qolmoqda va yuk egalari bunday qadamga rozi bo‘lishi ehtimoli past.

1 aprel kuni Germaniya Moliya vazirligi vakili xabar qilishicha, Germaniya davlat foydasiga ilgari nemis bojxonasi tomonidan musodara qilingan Eventin neft tankerini utilizatsiya qilishi mumkin edi. Yevropa Ittifoqi ma’lumotiga ko‘ra, kema Moskva G‘arb sanksiyalarini aylanib o‘tish uchun foydalanadigan Rossiya “soya floti”ning bir qismi hisoblanadi. Tanker bortida 100 000 tonna xom neft bo‘lib, uning qiymati 40 mln yevro deb baholangan.

Ish materiallaridan ko‘rinishicha, Panama bayrog‘i ostida yurgan Eventin tankeri neftni Rossiyaning Ust-Luga portidan Boltiq dengizi orqali Misrga olib ketayotgan bo‘lgan. Yanvar o‘rtalaridan dvigatel ishdan chiqqanligi sabab kema Germaniyaning Ryugen orolidan shimolroqda qolib ketgan va keyin Germaniya sohiliga tortib keltirilgan.

Yevropa rasmiylari ma’lumotiga ko‘ra, RFning “soya floti” deb ataluvchi tarkibga so‘nggi yillarda turli kichik davlatlarda ro‘yxatdan o‘tkazilgan, ammo amalda Rossiya boshqarayotgan bir necha yuzlab tanker kiradi. Moskva ulardan RFning Ukrainaga qarshi davom etayotgan keng ko‘lamli hujumi munosabati bilan G‘arb davlatlari joriy etgan embargoni aylanib o‘tib neft sotish uchun foydalanadi.

Fevral oxirida Eventin tankeri YeI ro‘yxatiga kiritilgan — unda RF “soya floti”ning ehtimoliy ishtirokchilari sanab o‘tilgan. Der Spiegel jurnali yozishicha, Germaniya hukumatining ushbu tankerga nisbatan g‘ayrioddiy qattiq pozitsiyasi federal kansler idorasi hamda Germaniya Tashqi ishlar vazirligi Rossiyaga Berlin Boltiq dengizi orqali sanksiyalarni chetlab o‘tib Rossiya neftini tashishga befarq qarab turmasligini ko‘rsatmoqchi bo‘lgani bilan bog‘liq.