Eron Rossiyaga qariyb 3 mlrd dollarlik raketalar sotgan

Eron Ukrainaga qarshi urushni qo‘llab-quvvatlash uchun Rossiyaga qariyb 3 mlrd dollarlik raketalar sotgan. Bu haqda Bloomberg agentligi 12 yanvar, dushanba kuni xavfsizlik sohasidagi g‘arblik ekspertga tayanib xabar qildi. Uning bahosiga ko‘ra, 2021 yil oktyabridan — Rossiyaning Ukrainaga keng ko‘lamli hujumi boshlanishidan oldin Moskva bilan tuzilgan shartnomalar hajmi taxminan 2,7 mlrd dollarni tashkil etgan.

Xaridlar tarkibiga Fath-360 turidagi qisqa masofali yuzlab ballistik raketalar, shuningdek, qisqa masofali yana qariyb 500 ta boshqa ballistik raketa va havo mudofaa tizimlari bilan bog‘liq taxminan 200 ta zenit raketa kirgan.

Moskva va Tehron yaqinlashuvi 2022 yil fevralda Rossiyaning Ukrainaga qurolli hujumi fonida kuchaygan. Urush Moskvaga qarshi keng ko‘lamli sanksiyalarga sabab bo‘lib, Sovuq urush davridan beri Rossiya—G‘arb munosabatlaridagi eng jiddiy inqirozga aylangan. Bloomberg ta’kidlashicha, Eron qurollarining yetkazib berilishi ikki davlat hamkorligini yanada mustahkamlagan.

Agentlik suhbatdoshiga ko‘ra, Eron Rossiyaga millionlab patronlar va artilleriya snaryadlari ham yetkazib bergan. Shu bilan birga, bu baholash xaridlarning butun hajmini qamrab olmaydi, chunki qo‘shimcha yetkazib berishlar kutilmoqda.

Boshqa jihatdan, Tehron Moskvaga Shahed-136 zarbali uchuvchisiz apparatlarini va Rossiyaga ularni “Geran-2” nomi bilan ishlab chiqarishni yo‘lga qo‘yish imkonini bergan texnologiyalarni ham topshirgan. Bu 2023 yil boshida imzolangan 1,75 mlrd dollarlik shartnoma doirasida sodir bo‘lgan.

G‘arblik manbaning bahosiga ko‘ra, umumiy hisobda Rossiya 2021 yil oxiridan buyon Eronning harbiy uskunalarini xarid qilish uchun 4 mlrd dollardan ortiq mablag‘ sarflagan.

Manba ma’lumotlariga ko‘ra, Eronning Rossiya bilan yaqinlashuvi 2010-yillardanoq — G‘arb bosimi va Eron yadroviy dasturi tufayli joriy qilingan sanksiyalar fonida boshlangan. 2025 yil yanvarda Tehron va Moskva strategik sheriklik to‘g‘risidagi kelishuvni imzolagan, biroq unda o‘zaro mudofaa bo‘yicha qoidalar yo‘q.

Shu bilan birga, manbaga ko‘ra, Rossiya o‘tgan yili Eron hududiga berilgan Isroil va AQSh zarbalari paytida Tehronga sezilarli yordam ko‘rsatmagan. Biroq Moskva va Tehron Eron orqali Hindistongacha bo‘lgan savdo yo‘lagini rivojlantirish ustida ishlamoqda va sanksiyalar ta’sirini kamaytirish uchun moliya va bank sohasidagi hamkorlikni kengaytirishni muhokama qilyapti.

Bloomberg so‘rovlariga Rossiya Mudofaa vazirligi va Eron Tashqi ishlar vazirligi javob bermagan.