Makron AQShga qarshi javob choralari ko‘rishni taklif qilmoqda

Fransiya prezidenti Emmanyuel Makron AQSh prezidenti Donald Tramp ilgari surgan boj joriy etish tahdidi amalga oshadigan bo‘lsa, Yevroittifoqning majburlashga qarshi kurashish (ACI) vositasini ishga solishni taklif etmoqda. Bu haqda Le Figaro va AFP xabar berdi.

«AQSh tomonidan savdo munosabatlariga nisbatan tahdidlar Yevroittifoq va AQSh o‘rtasida o‘tgan yili tuzilgan bojlar to‘g‘risidagi kelishuvni shubha ostiga qo‘ymoqda», — deb yozadi Le Figaro Makronning yaqin hamkori so‘zlariga tayanib.

AFP agentligining xabariga ko‘ra, Fransiya prezidenti «kun davomida yevropalik hamkorlari bilan muloqotda bo‘lgan».

2023 yil oxirida kuchga kirgan Majburlashga qarshi kurashish vositasi (Anti-Coercion Instrument, ACI) Yevropa mamlakatlariga iqtisodiy javob choralari uchun kengaytirilgan vakolatlarni taqdim etadi.

Unga ko‘ra, texnologiya korporatsiyalariga nisbatan qo‘shimcha soliq va yig‘imlar joriy etish, investitsiyalarni cheklash, Yevroittifoq bozoriga kirishni cheklash yoki yopish, kompaniyalarning tenderlarda qatnashishini taqiqlash imkonini beradi.

Avvalroq Donald Tramp Yevropaning sakkiz mamlakatiga nisbatan 10 foizlik boj joriy etilishini e’lon qilgandi.