Qoʻshimcha funksionallar
-
Tungi ko‘rinish
Toshkent viloyatida avtoqismlar do‘konida yong‘in chiqdi
Toshkent viloyatining Piskent tumanida joylashgan avtomobil ehtiyot qismlari do‘konida yong‘in sodir bo‘ldi. Hodisa oqibatida jabrlanganlar qayd etilmagan, yong‘in esa qisqa vaqt ichida bartaraf etilgan.
Toshkent viloyati Favqulodda vaziyatlar bosh boshqarmasi ma’lumotiga ko‘ra, 22 iyun kuni soat 09:35 da «112» tizimi orqali Piskent tumanidagi Oybek mahallasi hududida joylashgan avtomobil ehtiyot qismlari do‘konida yong‘in yuz berayotgani haqida xabar kelib tushgan.
Shundan so‘ng voqea joyiga qutqaruv bo‘linmalari jalb qilinib, ular soat 09:45 da hududga yetib borgan. Yong‘in soat 09:48 da qurshab olingan va soat 10:14 da to‘liq o‘chirilgan.
Qutqaruvchilarning tezkor harakatlari natijasida binoning 300 kvadrat metr maydonini yong‘indan saqlab qolishga erishilgan.
Favqulodda vaziyatlar xizmati ma’lum qilishicha, hodisa oqibatida tan jarohati olganlar yo‘q.
Ayni paytda yong‘inning kelib chiqish sabablari hamda yetkazilgan moddiy zarar miqdori aniqlanmoqda.
