Италияда 6,7 магнитудали зилзила содир бўлди

Марказий Италияда 6,7 магнитудали зилзила содир бўлган. Зилзила маркази Римдан шимоли-шарқ томонга 132 километрда бўлган. Бу ҳақида Европа-Ўрта ер денгизи сейсмология маркази хабар берди. 

Манбага кўра, зилзила маркази Римдан шимоли-шарқ томонга 132 километрда ва 26 октябрда ер ости силкинишларидан жабр кўрган Перужа шаҳридан шарққа томон 67 километрда бўлганлиги қайд этилган. 

Бундан аввал Италияда 24 августга ўтар кечаси 6,0 магнитудали зилзила юз берганлиги ҳақида хабар берилганди. Мамлакатнинг Лацио, Марке ва Умбрия вилоятларида вайронагарчиликлар қайд этилган. Зилзила Рим, Флоренция ва Болонья шаҳарларида ҳам сезилган.

Сўнгги маълумотларга кўра, табиий офат оқибатида 298 нафар киши ҳалок бўлган, бир неча юзлаб кишилар жароҳат олишган, 3 мингдан кўпроқ киши бошпанасиз қолиб кетган.