Дубай полицияси раҳбари ҳаётдан кўз юмди

Фото:Credit: Supplied

Дубай полицияси раҳбари генерал-лейтенант Хамис Маттар Ал-Мазийна 24 ноябрь куни тунда шаҳардаги Рашид шифохонасида юрак хуружи туфайли ҳаётдан кўз юмди. Бу ҳақида Gulf News нашри хабар берди.

Хамис Маттар ушбу лавозимда 2013 йилдан буён хизмат қилиб келган.

Дафн маросими 25 ноябрь, жума куни Ал-Кузайс мозорида бўлиб ўтди. Жанозада юзлаб кишилар унинг ҳаққига дуо қилишди. Шайхлар ва бир қатор мансабдор шахслар ҳам марҳумнинг оила аъзоларига ўз ҳамдардликларини билдиришди.

"Хамис Маттар жуда очиқ, ҳазил-мутойибани ўрнига қўядиган ажойиб инсон эди. У турли янги департаментлар жорий этиб ҳамда имкониятларни янада кенгайтириб, Дубай полициясига катта фойда келтирди", - дейди Дубай полициясининг покистонлик ходими.