Жанубий Корея президенти истеъфога чиқиш муддатини эълон қилиши мумкин

Корея республикаси президенти Пак Кин Хе парламентда унга нисбатан импичмент эълон қилишидан аввал миллатга мурожаат қилиши мумкин. У ўз халқига қарата навбатдаги маърузасида истеъфосига оид аниқ бир муддатни маълум қилиши эҳтимол, деб хабар қилмоқда Ёнхап агентлиги экспертлар ва дипломатик доиралар вакиллари фикрларига таянган ҳолда. 

"Тахминимча, у 7 декабрь куни халқига янги мурожаат қилади. Унинг бундан бошқа чораси йўқ. Ўйлайманки, Пак Кин Хе апрель ойи охирида ўз лавозимини тарк этади. Шу билан мухолифатнинг импичмент борасидаги босими бироз заифлашади", — дея ҳукмрон блок вакилининг сўзларини келтиради агентлик. 

Ўтган ҳафтада парламентдаги учта мухолиф партия президент импичменти бўйича қонун лойиҳасини киритган эди. Ушбу ҳужжат бўйича овоз бериш жараёни 9 декабрда бўлиб ўтиши кутилмоқда.