Малайзия Ким Чен Намнинг танасини Пхеньянга жўнатишга ваъда берди

Малайзия КХДР раҳбари Ким Чен Иннинг ўгай акаси Ким Чен Намнинг танасини Пхеньянга етказишни ваъда қилди. Бу ҳақда Малайзия бош вазири ўринбосари Аҳмад Зоҳид Ҳомид журналистларга маълум қилган.

Унинг сўзларига кўра, расмий Пхеньян Малайзияга шу борада мурожаат қилган. Аммо жасадни юборишдан олдин тегишли ишлар амалга оширилиши керак бўлади.

14 февраль куни Малайзия пойтахти Куала-Лумпур шаҳрида Ким Чен Нам суиқасд қурбонига айланди. Манбалар маълумотларига кўра, икки аёл унга заҳарланган игна билан ҳужум қилган. КХДР раҳбарининг акаси шифохонага кетишда жон берган. Марҳумнинг танаси ёриб кўрилган, аммо ҳали суд-тиббий экспертиза хулосалари ошкор қилинмади.

Айни вақтга келиб, бу қотиллик содир этилишида гумон қилинган икки аёл ҳибсга олинди. Аввалига Вьетнам паспортига эга 28 ёшли аёл ушланди, у Ким Чен Намни аэропортга олиб келган таксичи эди. Бугун яна бир гумонланувчи қўлга олинди. Яна 4 киши қидирувда.