Сурия Исроил самолётини уриб туширганини маълум қилди

Сурия армияси мамлакат ҳаво кенгликларини бузиб ўтган Исроил ҲҲК самолётини уриб туширгани ҳақида маълум қилди. Бу ҳақда ҳарбий манбага асосланган ҳолда РИА Новости хабар тарқатган.

Агентлик маълумотига кўра, исроилликларнинг 4 самолётидан биттаси уриб туширилган.

«Бизнинг ҳаво ҳужумидан мудофаа тизимимиз ҳудуд бу ҳаракатга жавоб қайтарди ва самолётлардан бири уриб туширилди. Бошқа самолётлар учиб кетди», -дейилган баёнотда.

Баёнотда айтилишича, Исроил авиациясининг нишони Сурия армиясининг Пальмирадаги объектлари бўлган.

Исроил телевидениесининг «Ўнинчи канал»и эса Исроил ҳарбий-ҳаво кучлари самолётлари Сурия қуролли кучларининг С-200 зенит-ракета комплексидан ўққа тутилгани, бироқ улар нишонга тегмагани ҳақида хабар берган. 

«Исроил ҳарбий-ҳаво кучлари самолётлари «Ҳизбуллоҳ» ҳаракати учун мўлжалланган қуролли конвойга ҳужум уюштирди. Операция давомида самолётларга ҳаво мудофааси тизимлари ракеталаридан зарба берилди, бироқ уларга зарар етмади», — дейилган телеканал хабарида.